ព្រះសីហនុ៖ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) នៃបេឡាជាតិរបបសន្ដិសុខសង្គម កាលពីព្រឹកថ្ងៃអង្គារ ១៣រោច ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែកក្កដា ឆ្នាំ២០១៨ បានចុះបណ្តុះបណ្តាលច្បាប់ស្តីពីចរាចរណ៍ផ្លូវគោក ដើម្បីស្វែងយល់ពីច្បាប់ចរាចរណ៍ផ្លូវគោកបន្ថែមទៀត និងត្រៀមប្រឡងផ្តល់បណ្ណបើកបរ ដល់អ្នកបើកបរយានយន្តដឹកកម្មករនិយោជិត ដែលមិនមានបណ្ណបើកបរ និងមានបណ្ណបើកបរមិនស្របតាមយានយន្ត នៅតំបន់សេដ្ឋកិច្ចពិសេសខេត្តព្រះសីហនុ ដែលមានអ្នកចូលរួមចំនួន ៤៥នាក់។
ពិធីប្រជុំផ្សព្វផ្សាយនេះមានគោលបំណង ដើម្បីឱ្យអ្នកបើកបរយានយន្តដឹកកម្មករនិយោជិត បានយល់ដឹងបន្ថែមពីច្បាប់ចរាចរណ៍ផ្លូវគោក និងផ្តល់ភាពងាយស្រួលដល់អ្នកបើកបរឡានដឹកកម្មករនិយោជិត ត្រៀមប្រឡងយកបណ្ណបើកបរឡានដឹកកម្មករស្របតាមយានយន្ត និងជម្រុញឱ្យមានការចូលរួមគោរពច្បាប់ចរាចរណ៍ផ្លូវគោកឱ្យបានត្រឹមត្រូវ ក្នុងន័យរួមចំណែកកាត់បន្ថយគ្រោះថ្នាក់ចរាចរណ៍ឱ្យមកនៅកម្រិតទាប។
ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត បានសំណូមពរដល់អ្នកបើកបរដឹកកម្មករទាំងអស់ ត្រូវមកចុះឈ្មោះប្រឡងយកបណ្ណបើកបរឱ្យស្របតាមប្រភេទយានយន្តដែលច្បាប់បានកំណត់។
រយៈពេលកន្លងមក ក្រុមការងារ ស.ផ.ក បានសហការជាមួយរដ្ឋបាលរោងចក្រគ្រប់តំបន់នៅក្នុងខេត្តព្រះសីហនុ ដើម្បីប្រមូលអ្នកបើកបររថយន្តដឹកកម្មករ មកធ្វើការបណ្តុះបណ្តាល មានចំនួនសរុប ៣៣០នាក់ ក្នុងនោះ អ្នកបើកបរដែលគ្មានបណ្ណបើកបរមានចំនួន ៣៧នាក់ និងមានបណ្ណបើកបរមិនស្របតាមប្រភេទយានយន្តមានចំនួន ១៧០នាក់។
ក្រុមការងារ ស.ផ.ក ក៏បានអំពាវនាវដល់អ្នកបើកបររថយន្តដឹកកម្មករទាំងអស់ត្រូវ៖
- ត្រូវគោរពច្បាប់ចរាចរណ៍ឱ្យបានខ្ជាប់ខ្ជួន
- មិនត្រូវផ្ទុកកម្មករលើសចំណុះ
- ត្រូវត្រួតពិនិត្យយានយន្តមុនពេលចេញទៅដឹកកម្មករ
- ត្រូវឈៀករថយន្តជាប្រចាំ
- ត្រូវទៅប្រឡងយកបណ្ណបើកបរឱ្យស្របតាមប្រភេទយាន
- ត្រូវចូលរួមវគ្គបណ្តុះបណ្តាលរបស់ក្រុមការងារ ប.ស.ស ស្តីពីច្បាប់ចរាចរណ៍ផ្លូវគោក
ជាពិសេសត្រូវប្រកាន់ខ្ជាប់នូវក្រមសិល្ប៍ធម៌ទាំង ១០ចំណុចរបស់គណៈកម្មការជាតិ គ.ស.ច.គ ៕
