កិច្ចប្រជុំលើការអនុវត្តគម្រោងស្តីពី ការគាំទ្រសកម្មភាពមូលដ្ឋានតាមរយៈបណ្តាញនិយោជក និងកម្មករនិយោជិតអន្តរជាតិ (SGRA) សម្រាប់វិស័យកសិកម្ម

ប្រទេសថៃ៖ ក្រោមការចាត់តាំងពីសំណាក់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. លោក សោម សុខធី អនុប្រធាននាយកដ្ឋានសេវាអតិថិជន និងទំនាក់ទំនងសាធារណៈ បានចូលរួមកិច្ចប្រជុំការអនុវត្តគម្រោងស្តីពី ការគាំទ្រសកម្មភាពមូលដ្ឋានតាមរយៈបណ្តាញនិយោជក និងកម្មករនិយោជិតអន្តរជាតិ (SGRA) សម្រាប់វិស័យកសិកម្ម ចាប់ពីថ្ងៃទី១៩ ដល់ ២២ ខែធ្នូ ឆ្នាំ២០២២ នៅខេត្តខនកេន ប្រទេសថៃ។
កិច្ចប្រជុំនេះ ត្រូវបានរៀបចំឡើងក្នុងគោលបំណងដើម្បីពិនិត្យទៅលើវឌ្ឍនភាព និងការរីកចម្រើននៃការអនុវត្តគម្រោង SGRA ក៏ដូចជាការចែករំលែកនូវបទពិសោធន៍ ឧត្តមានុវត្តន៍ក្នុងការអនុវត្តរបបសន្តិសុខសង្គម និងកិច្ចសហប្រតិបត្តិការនាពេលអនាគត ក្នុងចំណោមបណ្តាប្រទេសដែលជាសមាជិកនៃគម្រោង SGRA ក្នុងគោលបំណងពង្រីកការគ្របដណ្តប់ប្រព័ន្ធសន្តិសុខសង្គមឱ្យបានទូលំទូលាយទៅដល់ប្រជាជនគោលដៅក្នុងវិស័យកសិកម្ម។
សូមបញ្ជាក់ផងដែរថា៖ កិច្ចប្រជុំនេះ ត្រូវបានរៀបចំឡើងដោយមូលនិធិការងារអន្តរជាតិជប៉ុន (JILAF) និងមូលនិធិការងារអន្តរជាតិជប៉ុន-ថៃ (JILAF-Thailand) ដោយមានការចូលរួមដោយផ្ទាល់ពីបណ្តាប្រទេសជាសមាជិកគម្រោង SGRA តំណាងក្រសួងការងារ នៃព្រះរាជាណាចក្រថៃ មូលនិធិការងារអន្តរជាតិជប៉ុន (JILAF) មូលនិធិការងារអន្តរជាតិជប៉ុន-ថៃ (JILAF-Thailand) សហព័ន្ធសហជីពអន្តរជាតិ (ITUC) និងហូមណេត និងស្ថាប័នពាក់ព័ន្ធសរុបប្រមាណជា ២០នាក់។