(ភ្នំពេញ)៖ ដោយទទួលបានការអនុញ្ញាតពីសំណាក់ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ នាព្រឹកថ្ងៃទី៣ ខែធ្នូ ឆ្នាំ២០២៥នេះ លោក សុក បូរ៉ា ប្រធាននាយកដ្ឋានតាវកាលិកសន្ដិសុខសង្គម នៃ ប.ស.ស. បានអញ្ជើញជាវាគ្មិនកិត្តិយសក្នុងកម្មវិធីសិក្ខាសាលាពិគ្រោះយោបល់ស្ដីពី “បញ្ហាប្រឈមសុខភាពសុវត្ថិភាពការងារ និងផលប៉ះពាល់ពីការប្រែប្រួលអាកាសធាតុមកលើកម្មករនិយោជិតក្នុងវិស័យសំណង់ និងកម្មករសិប្បកម្មឡឥដ្ឋនៅកម្ពុជា” ក្រោមអធិបតីភាពលោកជំទាវ ជា សុខនី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។
សិក្ខាសាលានេះរៀបចំក្នុងគោលបំណង ដើម្បីកំណត់បញ្ហាប្រឈមផ្នែកសុខភាព សុវត្ថិភាពការងារ រួមទាំងផលប៉ះពាល់សុខភាពដោយសារការប្រែប្រួលអាកាសធាតុ ព្រមទាំងលើកផែនការយុទ្ធសាស្ត្រដើម្បីដោះស្រាយបញ្ហាទាំងនោះ ឱ្យកាន់តែប្រសើរ និងមានប្រសិទ្ធភាពខ្ពស់។
ក្នុងឱកាសនោះដែរ លោក សុក បូរ៉ា បានចែករំលែកចំណេះដឹងស្តីពីអត្ថប្រយោជន៍ នៃរបបសន្តិសុខសង្គម ដោយរួមមាន៖ ផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន ព្រមទាំងអត្ថប្រយោជន៍ផ្សេងៗ ស្របទៅតាមការកំណត់ ដូចមានចែងក្នុងបទប្បញ្ញត្តិ នៃច្បាប់ស្ដីពីរបបសន្តិសុខសង្គម ជូនដល់អ្នកចូលរួមក្នុងសិក្ខាសាលា ព្រមទាំងឆ្លើយតបទៅនឹងសំណួរមួយចំនួន ពីសំណាក់សមាជិក សមាជិកា នៃសហព័ន្ធសហជីពកម្មករសំណង់និងព្រៃឈើកម្ពុជាផងដែរ។
សូមបញ្ជាក់ថា សិក្ខាសាលានេះរៀបចំដោយសហព័ន្ធសហជីពកម្មករសំណង់ និងព្រៃឈើកម្ពុជា នៅសណ្ឋាគារកាំបូឌីយ៉ាណា រាជធានៅភ្នំពេញ ដោយមានអ្នកចូលរួមប្រមាណជា៩០នាក់៕
