ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត ហៅកាត់ថា ស.ផ.ក បានបង្កើតឡើងក្នុងឆ្នាំ២០១៣ គឺជាក្រុមការងារ ដែលមានការចូលរួមពីភាគីពាក់ព័ន្ធសំខាន់ៗ ដូចជាក្រសួងការងារ និងបណ្តុះបណ្តាលវិជ្ជាជីវៈ ក្រសួងមហាផ្ទៃ ក្រសួងសុខាភិបាល ក្រសួងសាធារណការ និងដឹកជញ្ជូន សមាគម និងអង្គការវិជ្ជាជីវៈ ដើម្បីចូលរួមទប់ស្កាត់ និងបង្ការគ្រោះថ្នាក់ចរាចរណ៍លើ កម្មករនិយោជិតគ្រប់វិស័យ ពិសេសវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ដែលជាក្រុមគោលដៅប្រឈមងាយរងគ្រោះ។
ក្រុមការងារនេះ មានតួនាទីភារកិច្ចដូចជា៖
-កសាងផែនការសកម្មភាពសំដៅទប់ស្កាត់គ្រោះថ្នាក់ចរាចរណ៍ផ្លូវគោក ដែលអាចកើតមានក្នុងពេលកម្មករនិយោជិតធ្វើដំណើរ
- សិក្សាស្រាវជ្រាវ ប្រមូលទិន្នន័យ វិភាគរកមូលហេតុចម្បងៗ ដែលនាំឲ្យកើតមានគ្រោះថ្នាក់ចរាចរណ៍ ក្នុងការធ្វើដំណើររបស់កម្មករនិយោជិត
– ស្រង់ស្ថិតិមធ្យោបាយដឹកជញ្ជូនកម្មករនិយោជិត និងអ្នកបើកបរ តាមរោងចក្រ សហគ្រាសទូទាំងប្រទេស
– រៀបចំវិធានការផ្សព្វផ្សាយអប់រំ ណែនាំស្តីពី ច្បាប់ និង សុវត្ថិភាពចរាចរណ៍ដល់អ្នកបើកបរ និងកម្មករនិយោជិត
– សហការជាមួយអាជ្ញាធរដែនដី សមត្ថកិច្ចពាក់ព័ន្ធ រួមបញ្ចូលទាំងសមត្ថកិច្ចចរាចរណ៍ផ្លូវទឹក ក្នុងការចុះត្រួតពិនិត្យមធ្យោបាយដឹកជញ្ជូនកម្មករនិយោជិត តាមគោលដៅដើមទីមុនពេលចេញដំណើរ និងសម្របសម្រួលករណីកម្មករនិយោជិតជួបគ្រោះថ្នាក់ចរាចរណ៍
– អនុវត្តភារកិច្ចផ្សេងៗទៀត តាមករប្រគល់របស់រដ្ឋមន្រ្តីក្រសួងការងរ និងបណ្តុះបណ្តាល វិជ្ជាជីវៈ។
* សេចក្តីសម្រេចលេខ ០០២/១៣ កប/ស.ស.រ ចុះថ្ងៃទី២៥ ខែមករា ឆ្នាំ ២០១៣ ស្តីពី ការបង្កើតក្រុមការងារ សុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត
* សេចក្ដីសម្រេចលេខ ០៨៩/២១ ក.ប/ស.ស.រ.ប.ស.ស ចុះថ្ងៃទី២៥ ខែវិច្ឆិកា ឆ្នាំ២០២១ ស្ដីពីការកែសម្រួលសមាសភាព ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតនៃបេឡាជាតិសន្តិសុខសង្គម
* សេចក្ដីសម្រេចលេខ ០០៨/២២ ក.ប/ស.ស.រ.ប.ស.ស ចុះថ្ងៃទី២១ ខែមករា ឆ្នាំ២០២២ ស្ដីពី ការតែងតាំង ប្រធានក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតនៃបេឡាជាតិសន្តិសុខសង្គម
