(ភ្នំពេញ)៖ នារសៀលថ្ងៃទី៧ ខែតុលា ឆ្នាំ២០២៥ នេះ ក្រុមការងារឆ្លើយតប និងផ្តល់ព័ត៌មានពាក់ព័ន្ធនឹងសេវាសាធារណៈ របស់ក្រសួងការងារ និងបណ្ដុះបណ្ដាលវិជ្ជាជីវៈ ទទួលបានវគ្គបណ្ដុះបណ្ដាលស្ដីពី “ការព្យួរកិច្ចសន្យាការងារតាមប្រព័ន្ធគ្រប់គ្រងទិន្នន័យរួមពាក់ព័ន្ធនឹងវិស័យការងារ (LACMS)” ប្រព្រឹត្តទៅក្រោមអធិបតីភាព ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាអនុប្រធានក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ នៅទីស្នាក់ការកណ្ដាល ប.ស.ស រាជធានីភ្នំពេញ។
វគ្គបណ្ដុះបណ្ដាលនេះ ជាការបំពេញបន្ថែមនូវចំណុចខ្វះខាតរបស់ក្រុមការងារឆ្លើយតប និងផ្តល់ព័ត៌មានពាក់ព័ន្ធនឹងសេវាសាធារណៈ ដើម្បីពង្រឹងសមត្ថភាព ចំណេះដឹងពាក់ព័ន្ធនឹងការផ្តល់សេវាសាធារណៈ របស់ក្រសួងការងារ និងបណ្ដុះបណ្ដាលវិជ្ជាជីវៈ ក្នុងការផ្ដល់ព័ត៌មានជូននិយោជក កម្មករនិយោជិត ប្រជាពលរដ្ឋ បានច្បាស់លាស់ ឆាប់រហ័ស និងត្រឹមត្រូវ។
ឯកឧត្តមបណ្ឌិតអនុប្រធានក្រុមការងារ បានជំរុញ និងលើកទឹកចិត្តដល់សិក្ខាកាមទាំងអស់ឱ្យយកចិត្តទុកដាក់រៀនសូត្រ លើកជាសំណួរ និងពិភាក្សាឱ្យបានផុលផុស ដើម្បីទទួលបានចំណេះដឹងច្បាស់លាស់ ប្រកបដោយផ្លែផ្កា នឹងអាចផ្តល់ព័ត៌មានពាក់ព័ន្ធនឹងសេវាសាធារណៈ របស់ក្រសួងការងារ និងបណ្ដុះបណ្ដាលវិជ្ជាជីវៈ ត្រឡប់ទៅកាន់និយោជក កម្មករនិយោជិត និងសមាជិក ប.ស.ស. បានឆាប់រហ័ស ច្បាស់លាស់ និងទទួលបានការសាទរ និងពេញចិត្តបន្ថែមទៀត៕
