ខេត្តសៀមរាប គឺជាខេត្តទី៣ ក្នុងខែតុលាដែលបងប្អូនពលករខ្មែរត្រឡប់មកពីប្រទេសថៃ ទទួលបានឱកាសការងារ និងការផ្សព្វផ្សាយអំពីអត្ថប្រយោជន៍របបសន្តិសុខសង្គម តាមរយៈកម្មវិធីពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ

(សៀមរាប)៖ នៅក្នុងខែតុលា ឆ្នាំ២០២៥នេះ បន្ទាប់ពីខេត្តបាត់ដំបង និងខេត្តបន្ទាយមានជ័យ សៀមរាប ជាខេត្តទី៣ ដែលបងប្អូនពលករខ្មែរវិលត្រឡប់មកពីប្រទេសថៃ ទទួលបានឱកាសការងារធ្វើ និងការផ្សព្វផ្សាយអំពីអត្ថប្រយោជន៍របបសន្តិសុខសង្គម តាមរយៈកម្មវិធីពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ ដែលកម្មវិធីនេះប្រព្រឹត្តទៅចំនួន ៣ស្រុកផ្សេងគ្នា រួមមាន៖ ស្រុកអង្គរជុំ (ថ្ងៃទី១៧ ខែតុលា), ស្រុកក្រឡាញ់ (ថ្ងៃទី១៨ ខែតុលា) និងស្រុកជីក្រែង (ថ្ងៃទី១៩ ខែតុលា ឆ្នាំ២០២៥) ដែលកម្មវិធីនេះ ត្រូវបានរៀបចំឡើងក្រោមកិច្ចសហការរវាង ប.ស.ស. និង NEA នៃក្រសួងការងារ និងបណ្តុះបណ្តាលវិជ្ជាជីវៈ ស.ស.យ.ក ខេត្តសៀមរាប និងអាជ្ញាធរមូលដ្ឋាន។
តាមរយៈកម្មវិធីពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ ខាងលើនេះ បងប្អូនពលករខ្មែរ ដែលបានវិលត្រឡប់មកពីប្រទេសថៃ និងកំពុងស្វែងរកការងារធ្វើ នឹងអាចជួបសម្ភាសន៍ផ្ទាល់ជាមួយតំណាងក្រុមហ៊ុន រោងចក្រ សហគ្រាស គ្រឹះស្ថានជាច្រើន ដែលកំពុងមានតម្រូវការកំលាំងពលកម្ម ជាពិសេសគឺទទួលបានការផ្សព្វផ្សាយដោយផ្ទាល់ពីសំណាក់មន្រ្តីជំនាញ ប.ស.ស. ស្តីអំពីអត្ថប្រយោជន៍របបសន្តិសុខសង្គម ដែលបងប្អូនពលករខ្មែរបានវិលត្រឡប់មកពីប្រទេសថៃ អាចទទួលបានបន្ទាប់ពីបានការងារធ្វើក្នុងស្រុក។
សូមបញ្ជាក់ផងដែរថា សម្រាប់បងប្អូនពលករខ្មែរ ដែលបានវិលត្រឡប់មកពីប្រទេសថៃ និងកំពុងស្វែងរកការងារធ្វើ ឬចង់ផ្លាស់ប្តូរការងារ គឺអាចប្រឹក្សាយោបល់បាន នៅគ្រប់រាជធានី-ខេត្តទូទាំងប្រទេស តាមរយៈទីភ្នាក់ងារជាតិមុខរបរ និងការងារ (NEA) ឬតាមរយៈលេខទូរសព្ទ Hotline ១២៩៧ ដោយឡែកសម្រាប់ចម្ងល់ផ្សេងៗពាក់ព័ន្ធជាមួយនឹងអត្ថប្រយោជន៍របបសន្តិសុខសង្គម បងប្អូនអាចទំនាក់ទំនងតាមរយៈលេខទូរសព្ទ Hotline ១២៨៦ ឬតាមរយៈបណ្ដាញសង្គមផ្លូវការរបស់ ប.ស.ស. បានផងដែរ៕