(ខេត្តកែប)៖ មន្ត្រីរាជការនៃរដ្ឋបាលខេត្តកែបប្រមាណជាង ២ ៦០០នាក់ កំពុងទទួលបានការគាំពាររបបសន្តិសុខសង្គមលើផ្នែកហានិភ័យការងារ និងផ្នែកថែទាំសុខភាពពីបេឡាជាតិសន្តិសុខសង្គម (ប.ស.ស.) ដោយក្នុងនោះមានមន្ត្រីរាជការចំនួន ៤៣៣នាក់ បាននាំសហព័ទ្ធមកចុះបញ្ជីជាសមាជិក ប.ស.ស. ដែលមានសហព័ទ្ធចំនួន ២៣៧នាក់ និងកូនក្នុងបន្ទុកចំនួន ៦៨៦នាក់ ដើម្បីក្លាយជាសមាជិក ប.ស.ស. ផ្នែកថែទាំសុខភាពតាមរបបភាគទានដោយស្ម័គ្រចិត្ត ក្នុងគោលបំណងទទួលបានសេវាគាំពារសុខភាពកាន់តែទូលំទូលាយ។
នេះជាប្រសាសន៍លើកឡើងរបស់ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ ក្នុងឱកាសអញ្ជើញជាសហធិបតីជាមួយ ឯកឧត្តម ព្រុំ គន្ធិ អភិបាលរង តំណាង ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប ក្នុងពិធីបើកសិក្ខាសាលាផ្សព្វផ្សាយស្តីពី «ការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខភាពសម្រាប់មន្រ្តីសាធារណៈ» ជូនដល់ថ្នាក់ដឹកនាំ និងមន្រ្តីរាជការក្រោមឱវាទរដ្ឋបាលខេត្តកែប នាព្រឹកថ្ងៃសុក្រ ទី១៣ ខែមីនា ឆ្នាំ២០២៦នេះ។
ឯកឧត្តមបណ្ឌិតអគ្គនាយករង ប.ស.ស. បានបន្តទៀតថា មន្រ្តីរាជការទាំងអស់ នៅពេលមានជំងឺ ឬគ្រោះថ្នាក់ដោយចៃដន្យ នឹងទទួលបានការគាំពារពី ប.ស.ស. ហើយនៅពេលសហព័ទ្ធ និងអ្នកក្នុងបន្ទុក ក្លាយជាសមាជិក ប.ស.ស. ពួកគាត់នឹងទទួលបានសេវាពិនិត្យ ព្យាបាល និងថែទាំដោយឥតគិតថ្លៃ នៅតាមមូលដ្ឋានសុខាភិបាលជាដៃគូ ប.ស.ស.។
ឯកឧត្តមបណ្ឌិតអគ្គនាយករង បានបន្ថែមថា បច្ចុប្បន្ន ប.ស.ស. កំពុងអនុវត្តយ៉ាងសកម្មប្រកបដោយស្មារតីទទួលខុសត្រូវខ្ពស់ ចំពោះការអនុវត្តរបបសន្ដិសុខសង្គមទាំង ៣ រួមមាន៖ ផ្នែកហានិភ័យការងារ ផ្នែកថែទាំសុខភាព និងផ្នែកប្រាក់សោធន ដោយធានាបានថាសមាជិក ប.ស.ស. ទាំងអស់ ទទួលបានការព្យាបាល និងទទួលបានសេវាផ្សេងៗប្រកបដោយប្រសិទ្ធភាព តម្លាភាព ឆាប់រហ័ស និងទាន់ពេលវេលា។
ជាមួយគ្នានេះដែរ ឯកឧត្តម ព្រុំ គន្ធិ អភិបាលរងនៃគណៈអភិបាលខេត្តកែប បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ក៏ដូចជា ប.ស.ស. ដែលបានពង្រីកវិសាលភាពការគាំពារ និងបានស្នើឱ្យថ្នាក់ដឹកនាំ និងមន្ត្រីរាជការទាំងអស់ ជួយផ្សព្វផ្សាយខ្លឹមសារអត្ថប្រយោជន៍នៃរបបសន្តិសុខសង្គមបន្តទៅកាន់មន្ត្រីក្រោមឱវាទ និងសមាជិកគ្រួសារ ដើម្បីឱ្យពួកគាត់មកចុះឈ្មោះជាសមាជិក ប.ស.ស. នៅតាមសាខា ប.ស.ស. ដែលនៅជិតបំផុត សំដៅទទួលបានអត្ថប្រយោជន៍ស្របតាមបទប្បញ្ញត្តិជាធរមាន៕
